絕情谷完結篇...

十月一日, 凌晨兩點. 陪伴我接近兩年的絕情谷已與世長辭. 初時收聽係因為想了解傳聞的囂張才子 - 倪震 (大Joe) 究竟有乜把炮? 另一位主持張燊悅, 老實講我就嘛嘛o勒. 不過話晒係星嘉坡這個鬼佬井底...我識o的乜啊?!

o岩o岩聽時, 感情生活並不理想. 聽到o的類似o既問題個案時, 很容易墮人角色, 也嘗試利用他人的意見o黎解決自身煩惱. 有時竟然都幾駛得o番.

聽耐o左, 發覺大Joe比起以前*聽講o者~* 收斂了許多. 亦都發覺佢同我在思維上有點相似. 例如, 大家都喜愛貓, 冇同Vivian結婚與唔想生育的理由, 同埋某些人生觀等等. 真係同人唔同命...

隨著張燊悅的離開, 谷祖琳(細Jo)頂上! *嘩~! 我happy到啊~!* 皆因我由陳果套"去年煙花特別多"開始已經好霖細 Jo. 家陣可以天天聽到佢把聲, 爽到爆啦!

聽著, 聽著真係上晒癮. 每天都定要上網聽Archive. 聽o下有邊個似我, 有邊個晒幸福, 有邊個做愚蠢的第三者, 有邊個做賤男人, 有邊個做淫婦, 有邊個俾大 Joe 剷/讚, 大細 Jo o既經歷, (貓貓)阿豹與阿叮的趣事, 坊間流傳的感人故事, 仲有o的勁爆的嘉賓主持(如鄭中基, 黃伊汶, 谷德昭等等)等等. 有次大Joe仲讀出我寫俾絕情谷有關星嘉坡禁口交法例o既電郵. 當時我非常開心, 很有參與感.

一向對心理學很有興趣的我, 係絕情谷到學到唔少o野 (雖然這始終係個娛樂商業節目). 有樣o野係我自己觀察到o既 *可能大家已早知~...* - "男人花心靠唔住" 係社會對男人的性別歧視. 女人花心的程度也不遑多讓. 那為什麼成日淨係聽人話衰男人呢? 點解硬係針對男人呢? 理由簡單, 女人潛意識喜歡申訴自己的不幸, 顯得軟弱, 換來呵護. 而男人就往往因為封建遺留下來的尊嚴與面子問題, 選擇了沉默...試圖自己解決問題...有時這份抑壓會換來血腥的悲劇收場...這個世界係公平的. 有奸夫就有淫婦, 有貞女就有忠男. 點都好, 這只不過係我個人o既淺見, 而我亦不過係個卑微的設計師...

對於絕情谷的完結, 初時以為會覺得很失落 *都有o的o的o既~*. 但係這幾年的起起落落, 加上大Joe不時講o既佛偈已經將我磨煉到略微可以笑看得失, 不佘多求o勒. 冇乜o野可以俾到兩位絕情谷主, 只有以下兩段:

絕嚮雖過

此情不改

心守谷內

期待"人兒"歸來...

絕  - 不代表永恆,

情  - 不等於擁有,

谷  - 亦望會有回音.

願絕情谷主們與全天下的絕情家人"性"福快樂(國語讀音)!

 

何謂愛?

如果你o地係有聽慣絕情谷的話. 可能你會聽過這段老人家的故事...

係一個很忙碌的早上大概八點半左右, 一位大約捌拾幾歲的老人家就想係醫院找位醫生為他拆除傷愈了的線. 但係因為有突發意外, o的醫生就實在係太忙o勒, 無瑕去幫這老者.

依位老人家就一路等, 就一路睇錶. 當時, 有一位剛值班的女護士見到老人家好似好趕時間咁, 就埋去幫佢拆線o勒.

女護士一面拆線就一面同位老人家傾偈. 跟著就好奇的問道,

女護士: 係o勒, 老伯伯呀, 做乜咁趕時間呀?

老伯伯: 係呀, 唔該晒你呀護士小姐. 因為我約o左人九點啊.

女護士就更好奇o勒...捌拾幾歲o既老伯伯應該係唔使返工o架啦, 乜咁趕呢? 咁個老人家就話,

老伯伯: 係呀,係呀, 我要趕去老人療養院o個到陪我老婆食早餐啊.

女護士: 原來你太太入o左療養院呀? 冇乜事o勒嗎?

老伯伯: 冇, 帕金遜症o者. 乜o野 都唔記得, 乜人都唔認得, 都一段日子喇.

女護士: 咁你都唔認得呀? 你係佢o既先生o黎o番?

老伯伯: 係呀,依五年都唔認得我喇. 我其實去唔去佢都唔知o架.

女護士: 喂, 咁老伯伯呀, 佢都唔認得你o勒, 咁你仲咁趕咁急住去做乜? 仲要朝朝早去?

咁位老人家就拍拍女護士隻手, 笑住說,

老伯伯: 嘿, 佢唔認得我o者, 但係我認得佢o丫o麻! 咁咪得囉!

說罷跟住就蹣跚地走o左o勒.

一個看似簡單的愛, 但係要做起上o黎就一點也不容易. 現下的快餐青年, 每樣o野都要速達. 剛入行就要有資深的待遇, 剛結識就要有轟轟烈烈的愛情故事. 經常嚮往鐵達尼裡的愛情故事. 老實講那只不過係兒戲罷了.

在死到臨頭, 要死係幾咁容易. 被蜜月期所沖昏了頭的di cuco加上凍壞o左個腦分分鐘以為自己好勁, 可以頂得順, 所以懶英咁讓個靚位俾肥溫...點知肥溫係汤豬凳...

如果佢o地兩個都冇事o既話. 咁佢o地會好開心咁過...o左...一個月...di cuco 就會身痕去叫雞, 然後幫隻雞畫肖像博食免費餐. 而肥溫就頂唔浦di cuco這件廢物兼淫蟲, 再加上冇錢, 就返外家另搵返個有錢o既嫁o左去...現實版動人嗎?

最近係餅奇他媽處讀到有關fuck buddy (扑友) 的短文. 以前o既聽起上o黎就好似好o的, 叫sex partner (性伴侶)...依家就...唉...我知好多人都有, 但我就做唔到...*唉~ 我out o勒~*

往往公公婆婆的故事唔係咁吸引係因為冇靚仔,靚女,靚車,靚衫,靚鞋,靚船,靚屋,靚景,靚鈔票,靚乜靚物...但係佢o地就係真在冇包裝.

說一年半載, 甚至三,五,七年的"我愛你"有乜難, 有乜咁大不了. 如果你可以三,五,七十年後仍然拖著你老伴的話, 我就話你勁o勒.

依篇文係用全繁體,加上廣東話o黎寫o既. 我知道好多人都唔識讀. 但係我就係明蝦佢o地o丫! 吹咩!